Cri

ᓂᑕᐌᔨᐦᑕᒧᒡ ᓇᒣᔅᑳᐤ ᓕᕠᔨᒻ ᒉ ᐅᔑᐦᑖᑲᓅᐦᒡ, ᒉ ᐱᒥᐸᔨᐦᑖᑲᓅᐦᒡ ᑲᔦᐦ ᒉᒃ ᒉ ᒋᐸᐦᐄᑲᓅᐦᒡ ᐅᔅᑎᔅᑲᒪᒡ ᐁ ᐅᐦᒋ ᓅᑎᓯᓈᓅᐦᒡ ᐁ ᒪᓈᐦᐆᓈᓅᐦᒡ ᔅᑆᑐᒦᓐ ᐊᓯᓃ (ᓕᕠᔨᒻ ᐊᒃᓵᐃᑦ ᐊᓯᓃ) ᐊᓂᔫ ᐁ ᑎᐯᔨᐦᑕᐦᒀᐤ ᐊᔅᒌᔫ ᐊᓂᑌᐦ ᐙᐴᒌ ᐁᐅᒄ ᐎᔦᔥ 30 ᐊᔅᒌᐤ ᑎᐸᐦᐄᑲᓐᐦ ᐙᐸᓅᑖᐦᒡ ᐁ ᐃᔅᐱᓯᓈᑯᐦᒡ ᐅᐦᒋ ᓇᒣᔅᑳᐤ ᑲᔦᐦ 300 ᐊᔅᒌᐤ ᑎᐸᐦᐄᑲᓐᐦ ᒌᐌᑎᓂᐦᒡ ᐅᐦᒋ ᔐᐴᑲᒨ ᐃᐦᑖᐎᓐ᙮ ᐊᓐ ᐁ ᐃᔑ ᓂᑕᐌᔨᐦᑖᑲᓅᐦᒡ ᐙᐴᒌ ᐋᐸᑎᓰᐎᓐ, ᐁᐅᒄ ᐅᔅᑎᔅᑲᒪᒡ ᒉ ᐅᐦᒋ ᓅᑎᓯᓈᓅᐦᒡ, ᒉ ᐅᔑᐦᑖᑲᓅᐦᒡ ᒉᒀᓐ ᓂᑖᒥᔅᑲᒪᒡ, ᒉ ᐸᔥᑯᒋᐦᑖᑲᓅᐦᒡ ᐊᓯᓃ ᐁ ᐄᔥᑯᐸᔨᐦᒡ, ᐁ ᐅᐦᒋ ᐅᔑᐦᑖᑲᓅᐦᒡ ᐊᓯᓃ, ᑲᔦᐦ ᐙᔅᑳᐦᐄᑲᓐᐦ ᒉ ᐅᐦᒋ ᐋᐸᑎᓰᓈᓅᐦᒡ ᑲᔦᐦ ᐐᔥᑲᒑᓂᑲᒥᒄ᙮

ᐆ ᐁ ᐅᐦᒋ ᓅᑎᓯᓈᓅᐦᒡ, ᐁᐅᒄ ᐐᓭᐌ 2,775 ᑳ ᑯᓯᑯᐦᒀᐤᐦ ᑎᐹᐹᔥᑯᒋᑲᓐᐦ ᒉ ᐃᔥᐱᔥ ᒨᓇᐦᐄᑲᓅᐦᒡ ᐊᓯᓃ ᒣᔑᑯᒻ ᒌᔑᑳᐤᐦ ᐊᓐ 26 ᑕᐦᑐ ᐱᐳᓐᐦ ᒉ ᐃᔥᐱᔥ ᐱᒥᐸᔨᐦᒡ ᐆ ᐁ ᐅᐦᒋ ᓅᑎᓯᓈᓅᐦᒡ᙮ ᐆ ᐁ ᐅᔑᐦᑖᑲᓅᐦᒡ ᒉ ᒌ ᐅᐦᒋ ᓅᑎᓯᓈᓅᐦᒡ, ᐁᐅᒄ ᐐᓭᐌ 250 ᐋᐸᑎᓰᓲᒡ ᒉ ᐅᑖᔅᑯᓈᑲᓅᑣᐤ, ᑲᔦᐦ ᐐᓭᐌ 185 ᐋᐸᑎᓰᓲᒡ ᒉ ᐋᐸᑎᓰᑣᐤ ᒥᔔ ᐁ ᐱᒥᐸᔨᐦᑖᑲᓅᐦᒡ ᐆ ᐁ ᓅᑎᓯᓈᓅᐦᒡ᙮ ᐁᔫᒄ ᐁ ᐐᐦ ᐱᑯᐦᑖᑣᐤ ᓇᒣᔅᑳᐤ ᓕᕠᔨᒻ ᒥᔥᑕᐦᐄ ᒉ ᐅᑖᔅᑯᓈᑣᐤ ᐄᔨᔨᐤᐦ/ᐄᓅᐦ ᑲᔦᐦ ᒉ ᒌ ᐋᐸᒋᐦᑖᑣᐤ ᐄᔨᔨᐤ/ᐄᓅ ᑳᒻᐸᓃᐦ, ᒬᐦᒡ ᐊᓂᔫᐦ ᐄᓅᐦ ᐊᓂᑌᐦ ᓇᒣᔅᑳᐦᒡ᙮

ᐊᓐ ᑳ ᓂᑑᒋᔅᒉᔨᐦᑖᑲᓅᐦᒡ ᑖᓐ ᒉ ᐃᔑ ᑖᐦᑲᐦᐄᒉᐸᔨᐦᒡ ᐊᔅᒌ ᑲᔦᐦ ᐱᒫᑎᓰᐎᓐ (ESIA) ᐅᐦᒋ ᐆ ᐙᐴᒌ ᐁ ᐅᐦᒋ ᓅᑎᓯᓈᓅᐦᒡ ᐋᐸᑎᓰᐎᓐ, ᓀᔥᑦ ᐊᓐ ᑳ ᒪᓯᓇᐦᐄᑲᓅᐦᒡ ESIA ᑎᐹᒋᒨᓯᓇᐦᐄᑲᓐ ᑲᔦᐦ ᑯᑕᒃᐦ ᑎᐹᒋᒨᓯᓇᐦᐄᑲᓐᐦ ᐁ ᐅᐦᒋ ᐐᒋᐦᐄᐌᐸᔨᐦᒀᐤᐦ, ᐁᔫᒄ ᐅᔫ ᑳ ᐸᒋᔅᑎᓂᐦᒀᐤ ᓇᒣᔅᑳᐤ ᓕᕠᔨᒻ ᒉ ᐙᐱᐦᑕᒥᔨᒡᐦ COMEX ᑳ ᒫᒨᐱᔥᑕᐦᒀᐤ ᐁ ᐙᐙᐱᐦᑕᐦᒀᐤ ᐋᐸᑎᓰᐎᓂᔫ, ᐁᐅᒄ ᐆ ᑖᐱᔥᑯᓐ ᑯᐯᒃ-ᐄᓅᒡ ᐁ ᐊᐱᑣᐤ ᐁ ᓈᓈᑲᒋᐦᑖᑣᐤ ᒉ ᐙᐙᐱᐦᑕᐦᒀᐤ ᐋᐸᑎᓰᐎᓐᐦ ᐁ ᐐᐦ ᒋᐦᒋᐦᑖᑲᓅᔨᒡᐦ ᐊᓂᑌᐦ ᒌᐌᑎᓂᐦᒡ ᑯᐯᒃ ᐊᔅᒌᐦᒡ, ᔖᐗᓅᑖᐦᒡ ᐊᓐ 55 ᑳ ᐃᑎᓯᓈᑌᒡ ᐊᔅᒌᐅᓯᓇᐦᐄᑲᓂᐦᒡ, ᑲᔦᐦ ᑳᓈᑖᐦ ᑳ ᐅᐦᒋ ᐙᐙᐱᐦᑕᐦᒀᐤ ᒉ ᐃᔑ ᑖᐦᑲᐦᐄᒉᐸᔨᓂᔨᒡ ᐋᐸᑎᓰᐎᓂᔫ ᐊᔅᒌᐦᒡ (CEAA) ᒣᒀᒡ ᓂᔅᒋᐲᓯᒻ 2013 ᑳ ᐃᔅᐸᔨᓂᔨᒡ᙮ ᐆ ᐙᐴᒌ ᐋᐸᑎᓰᐎᓐ, ᒌ ᒥᔨᑰᒡ ᑯᐯᒃ ᑎᐯᔨᐦᒋᒉᓲᐦ (MDDELCC) ᒪᓯᓇᐦᐄᑲᓂᔫ ᒉ ᒌ ᐱᒥᐸᔨᐦᑖᑣᐤ ᐊᓂᔫ ᐋᐸᑎᓰᐎᓂᔫ ᑳ ᐅᔥᑲᑯᒋᐦᒃ ᐱᓈᔅᒌᐅᐲᓯᒻ 2015 ᑳ ᐃᔅᐸᔨᓂᔨᒡ, ᑲᔦᐦ ᑳᓈᑖᐦ ᑎᐯᔨᐦᒋᒉᓲ ᒌ ᐅᐦᒋ ᒥᔨᑰᒡ ᐊᓂᔫ ᒪᓯᓇᐦᐄᑲᓂᔫ ᒣᒀᓃᐱᓂᐲᓯᒻ 2015 ᑳ ᐃᔅᐸᔨᓂᔨᒡ᙮

ᑮᐹ ᑯᔨᔅᒄ ᐁ ᐃᔑᓈᑯᐦᒡ ᐆ ᐌᐦᒋ ᐐᐦ ᒋᐦᒋᐸᔨᐦᑖᑲᓅᐦᒡ ᐋᐸᑎᓰᐎᓐ, ᐌᓯᓐ ᒥᓯᐦᑌᔅᑲᒪᒡ ᐊᔅᒌᐦᒡ ᓂᑕᐌᔨᐦᑖᑯᓐ ᓕᕠᔨᒻ ᐊᓯᓃ ᐊᓂᑦᐦ ᐁ ᐅᐦᒋ ᐅᔑᐦᑖᑲᓅᐦᒡ ᔅᑆᑐᒦᓐ ᐊᓯᓃᐦᒡ᙮ ᐐᐸᒡ 2000 ᑳ ᐃᔅᐸᔨᐦᒡ ᐊᔅᒌᐤ ᐊᒋᐦᑖᓱᓐ, ᒨᔥ ᒌ ᐄᔅᑯᐸᔫ ᐁ ᓂᑕᐌᔨᐦᑖᑯᐦᒡ ᓕᕠᔨᒻ ᐊᓯᓃ ᐊᓂᔫᐦ ᒉ ᒌ ᐅᔑᐦᑖᑲᓅᐦᒀᐤᐦ ᒥᐦᒉᑣᐤ ᐁ ᔮᐸᒋᐦᑖᑲᓅᐦᒀᐤᐦ ᐃᔥᑯᑌᔥᐦ (ᓂᑣᐱᐦᒋᑲᓐᐦ, ᐊᔨᒧᐙᑲᓂᔥᐦ, ᑳ ᓯᓂᑯᓂᑲᓅᔑᒡ, ᓂᒥᔅᒌᐤ ᐃᔥᑯᑌᔫ ᑳ ᐋᐸᒋᐦᑖᑦ ᐅᑖᐹᓂᔥᐦ, ᐁ ᐅᐦᒋ ᑲᓇᐌᔨᐦᑖᑯᐦᒡ ᓂᒥᔅᒌᐤ ᐃᔥᑯᑌᐤ)᙮ ᐊᓐ ᐁ ᐃᐦᑖᑦ ᐊᓯᓃ ᐊᓂᑌᐦ ᐙᐴᒌ, ᐁᐅᒄ ᒫᐅᒡ ᒥᔥᑕᐦᐄ ᐁ ᐃᐦᑖᑦ ᐅᑌᐦ ᒥᓯᐦᑌᔅᑲᒪᒡ ᓍᕐᕪ ᐋᒣᕆᑳ ᐊᔅᒌ ᐁ ᑲᓇᐙᐱᐦᑖᑲᓅᐦᒡ, ᑲᔦᐦ ᐁᐅᒄ ᓃᔓ ᐁ ᐃᐦᑕᑯᐦᒡ ᐁ ᐃᔥᐱᔥ ᒥᔥᑕᐦᐄ ᐁ ᐃᐦᑕᑯᐦᒡ ᓕᕠᔨᒻ ᐅᑌᐦ ᒥᓯᐦᑌᔅᑲᒪᒡ ᐊᔅᒌ ᐁ ᑲᓇᐙᐱᐦᑖᑲᓅᐦᒡ᙮

ᒪᔥᑰᑎᓅᐲᓯᒻ 2014 ᑳ ᐃᔅᐸᔨᐦᒡ, ᐐᓂᐹᑰᒡ ᓅᐦᒋᒦᐤ ᐄᓅᒡ ᐁ ᓈᑎᒫᑐᒡ (ᐄᔨᔨᐤ ᐊᔅᒌ), ᐄᔨᔨᐤ/ᐄᓅ ᑎᐯᔨᐦᒋᒉᐎᓐ, ᓇᒣᔅᑳᐤ ᐄᓅᒡ ᑲᔦᐦ ᓇᒣᔅᑳᐤ ᓕᕠᔨᒻ ᒌ ᐐᐦᑕᒧᒡ ᐁ ᒌ ᐲᐦᑌᐸᔨᑣᐤ ᒋᓄᒌ ᓇᔅᑯᒧᐎᓂᔫ ᐅᐦᒋ ᐊᓐ ᐁ ᑲᓇᐙᐱᐦᑖᑲᓅᐦᒡ ᐁ ᐅᔑᐦᑖᑲᓅᐦᒡ ᑲᔦᐦ ᐁ ᐱᒥᐸᔨᐦᑖᑲᓅᐦᒡ ᓇᒣᔅᑳᐤ ᓕᕠᔨᒻ ᐙᐴᒌ ᐋᐸᑎᓰᐎᓐ᙮ ᐊᓐ ᒋᓄᒌ ᓇᔅᑯᒧᐎᓐ, ᐁᐅᒄ ᓇᔅᑯᒧᐎᓐ ᒉ ᓈᓈᑲᒋᐦᑖᑣᐤ ᒉ ᐃᔑ ᐐᒑᐸᑎᓰᒥᑐᑣᐤ ᓇᒣᔅᑳᐤ ᓕᕠᔨᒻ ᑲᔦᐦ ᐊᓂᒌ ᐄᓅᒡ ᐁ ᑖᐦᑲᐦᐆᑯᑣᐤ ᒣᒀᒡ ᐊᓐ ᒥᓯᐌ ᐁ ᐃᔑ ᐱᒥᐸᔨᐦᒡ ᐙᐴᒌ ᓕᕠᔨᒻ ᐋᐸᑎᓰᐎᓐ᙮ 

ᒥᔔ ᑳ ᒌᔑᐸᔨᐦᒡ ᐁ ᓂᔥᑐᐐᓈᓅᐦᒡ, ᒌ ᐐᐦᑕᒧᒡ ᐄᓅᒡ ᐁ ᒥᔦᔨᐦᑕᐦᒀᐤ ᑖᓐ ᑳ ᐃᔑ ᓂᔥᑴᐅᔑᐦᐄᑯᑣᐤ ᓇᒣᔅᑳᐤ ᓕᕠᔨᒻ ᐊᓂᔫ ᐁ ᒌ ᐋᔨᒣᔨᐦᑕᒥᐦᐄᑯᑣᐤ ᒉᒀᔫ, ᒬᐦᒡ ᐁ ᐋᐸᐦᐄᐸᔨᐦᒡ ᒉ ᒌ ᐋᐸᒋᐦᑖᑲᓅᐦᒀᐤ ᐄᓅ ᑳᒻᐸᓃᐦ, ᐁ ᒋᔅᑯᑕᒫᓱᑣᐤ ᐋᐸᑎᓰᓲᒡ ᑲᔦᐦ ᒉ ᒌ ᐅᑖᔅᑯᓈᑲᓅᑣᐤ ᐊᐌᓂᒌ, ᑲᔦᐦ ᑯᑕᒋᔫ ᒉᒀᔫ᙮ ᐁᐅᒄ ᒉ ᐃᔥᐱᔥ ᐱᒥᐸᔨᐦᒡ ᐆ ᓇᔅᑯᒧᐎᓐ ᐊᓐ ᒉ ᐃᔥᐱᔥ ᐱᒥᐸᔨᐦᒡ ᐋᐸᑎᓰᐎᓐ ᐁ ᓅᑎᓯᓈᓅᐦᒡ, ᐁᑯᑦᐦ ᑲᔦᐦ ᐁ ᐐᔥᑖᒡ ᒉ ᐐᒋᐦᐄᐌᑣᐤ ᐄᔨᔨᐅᒡ/ᐄᓅᒡ ᐊᓐ ᐁ ᐅᔑᐦᑖᑲᓅᐦᒡ ᐋᐸᑎᓰᐎᓐ, ᑲᔦᐦ ᒉ ᐅᑖᔅᑯᓈᑲᓅᑣᐤ ᑲᔦᐦ ᒉ ᐋᐸᒋᐦᑖᑲᓅᐦᒀᐤᐦ ᑳᒻᐱᓃᐦ ᑲᔦᐦ ᒉ ᒋᐦᒋᐸᔨᐦᑖᑲᓅᐦᒡ ᒉ ᐅᐦᒋ ᒋᔅᑯᑕᒫᓱᑣᐤ ᐊᐌᓂᒌ ᒉ ᒌ ᐋᐸᑎᓰᑣᐤ᙮ ᐁᐅᒄ ᑳ ᐐᔥᑖᑣᐤ ᐊᓂᒌ ᑳ ᐐᒋᐦᐄᐌᑣᐤ ᔮᔨᑌ ᒉ ᐃᔑᓈᑯᓂᔨᒡ ᒉ ᐐᒋᐦᐄᐌᑣᐤ ᐄᔨᔨᐅᒡ/ᐄᓅᒡ ᐊᓐ ᐁ ᓈᓈᑲᒋᐦᑖᑲᓅᐦᒡ ᐊᔅᒌ, ᒬᐦᒡ ᐊᓐ ᐁ ᐙᐙᐱᐦᑖᑲᓅᐦᒡ, ᐁ ᒦᓄᐸᔨᐦᑖᑲᓅᐦᒡ ᒉᒀᓐ ᑲᔦᐦ ᐁ ᒋᐸᐦᐄᑲᓅᐦᒡ ᐊᓐ ᐋᐸᑎᓰᐎᓐ᙮ ᐊᓐ ᒋᓄᒌ ᓇᔅᑯᒧᐎᓐ, ᐁᐅᒄ ᐁ ᓅᑯᐦᒡ ᐁ ᐐᒑᐸᑎᓰᒥᑐᑣᐤ ᓇᒣᔅᑳᐤ ᓕᕠᔨᒻ ᑲᔦᐦ ᐄᔨᔨᐅᒡ/ᐄᓅᒡ ᒣᒀᒡ ᐊᓐ ᐁ ᐅᔑᐦᑖᑲᓅᐦᒡ ᑲᔦᐦ ᐁ ᐱᒥᐸᔨᐦᑖᑲᓅᐦᒡ ᐁ ᐅᔥᑳᒡ ᐁ ᓅᑎᓯᓈᓅᐦᒡ ᐊᓂᑌᐦ ᐄᔨᔨᐤ ᐊᔅᒌᐦᒡ᙮ ᐆ ᓇᔅᑯᒧᐎᓐ, ᐁᐅᒄ ᐁ ᒥᔪᐸᔨᐦᑖᑲᓅᔨᒡ ᐁ ᐃᔑ ᓂᑕᐌᔨᐦᑕᑯᐦᒀᐤ ᐊᓂᒌ ᑳ ᐐᒋᐦᐄᐌᑣᐤ ᐅᐦᒋ ᐊᓐ ᒉ ᒌ ᒥᔪᐸᔨᐦᒡ ᐁ ᐅᐦᒋ ᐅᔑᐦᐋᑲᓅᑦ ᔔᓕᔮᐤ ᑲᔦᐦ ᔮᔨᑌ ᒉ ᐐᒋᐦᐄᑯᑣᐤ ᐄᔨᔨᐅᒡ/ᐄᓅᒡ ᐁ ᐅᐦᒋ ᑳᓂᔫᑣᐤ ᔔᓕᔮᐤᐦ ᐊᓂᔫ ᓂᓈᐦᑰ ᐁ ᐃᔑ ᐱᒥᐸᔨᐦᑖᑲᓅᐦᒡ ᒉᒀᓐ ᑲᔦᐦ ᐁ ᐐᒋᐦᐄᐌᑣᐤ ᒉ ᒌ ᒥᔪᐸᔨᓂᔨᒡ ᐅᔫ ᐁ ᐅᐦᒋ ᓅᑎᓯᓈᓅᔨᒡ᙮